| 89:1 | ወአሐዱ፡ እምእልኩ፡ አርባዕቱ፡ ሖረ፡ ኀበ፡ ዝኩ፡ ላሕም፡ ጸዐዳ፡ ወመሀሮ፡ ምሥጢረ፡ እንዘ፡ ይርዕድ፡ ውእቱ፡ ላሕም፡ ተወልደ፡ ወኮነ፡ ሰብአ፡ ወጸረበ፡ ሎቱ፡ መስቀረ፡ ዐባየ፡ ወነበረ፡ ዲቤሃ፡ ወሠለስቱ፡ አልሕምት፡ ነበሩ፡ ምስሌሁ፡ በይእቲ፡ መስቀር፡ ወተከድነ፡ ላዕሌሆሙ። | ወአሐዱ፡ እምእልኩ፡ አርባዕቱ፡ ሖረ፡ ኀበ፡ ዝኩ፡ ላሕም፡ ጸዐዳ፡ ወመሀሮ፡ ምሥጢረ፡ እንዘ፡ ይርዕድ፡ ውእቱ፡ ላሕም፡ ተወልደ፡ ወኮነ፡ ሰብአ፡ ወጸረበ፡ ሎቱ፡ መስቀረ፡ ዐባየ፡ ወነበረ፡ ዲቤሃ፡ ወሠለስቱ፡ አልሕምት፡ ነበሩ፡ ምስሌሁ፡ በይእቲ፡ መስቀር፡ ወተከድነ፡ ላዕሌሆሙ። |
|---|
| 89:2 | ወአልዐልኩ፡ ካዕበ፡ አዕይንትየ፡ መንገለ፡ ሰማይ፡ ወርኢኩ፡ ናሕሰ፡ ልዑለ፡ ወሰብዐቱ፡ አስራብ፡ ዲቤሁ፡ ወእልኩ፡ አስራብ፡ ይውሕዙ፡ በአሐዱ፡ ዐጸድ፡ ማየ፡ ብዙኀ። | ወአልዐልኩ፡ ካዕበ፡ አዕይንትየ፡ መንገለ፡ ሰማይ፡ ወርኢኩ፡ ናሕሰ፡ ልዑለ፡ ወሰብዐቱ፡ አስራብ፡ ዲቤሁ፡ ወእልኩ፡ አስራብ፡ ይውሕዙ፡ በአሐዱ፡ ዐጸድ፡ ማየ፡ ብዙኀ። |
|---|
| 89:3 | ወርኢኩ፡ ካዕበ፡ ወነዋ፡ አንቅዕታት፡ ተርኅዉ፡ ዲበ፡ ምድር፡ በውእቱ፡ ዐጸድ፡ ዐቢይ፡ ወአኀዘ፡ ውእቱ፡ ማይ፡ ይፍላሕ፡ ወይትነሣእ፡ ዲበ፡ ምድር፡ ወኢያርአዮ፡ ለውእቱ፡ ዐጸድ፡ እስከ፡ ኵሉ፡ ምድሩ፡ ተከድነ፡ በማይ። | ወርኢኩ፡ ካዕበ፡ ወነዋ፡ አንቅዕታት፡ ተርኅዉ፡ ዲበ፡ ምድር፡ በውእቱ፡ ዐጸድ፡ ዐቢይ፡ ወአኀዘ፡ ውእቱ፡ ማይ፡ ይፍላሕ፡ ወይትነሣእ፡ ዲበ፡ ምድር፡ ወኢያርአዮ፡ ለውእቱ፡ ዐጸድ፡ እስከ፡ ኵሉ፡ ምድሩ፡ ተከድነ፡ በማይ። |
|---|
| 89:4 | ወበዝኀ፡ ዲቤሁ፡ ማይ፡ ወጽልመት፡ ወጊሜ፡ ወእሬኢ፡ መልዕልቶ፡ ለዝኩ፡ ማይ፡ ወተለዐለ፡ ውእቱ፡ ማይ፡ መልዕልቶ፡ ለውእቱ፡ ዐጸድ፡ ወይክዑ፡ መልዕልቶ፡ ለውእቱ፡ ዐጸድ፡ ወቆመ፡ ዲበ፡ ምድር። | ወበዝኀ፡ ዲቤሁ፡ ማይ፡ ወጽልመት፡ ወጊሜ፡ ወእሬኢ፡ መልዕልቶ፡ ለዝኩ፡ ማይ፡ ወተለዐለ፡ ውእቱ፡ ማይ፡ መልዕልቶ፡ ለውእቱ፡ ዐጸድ፡ ወይክዑ፡ መልዕልቶ፡ ለውእቱ፡ ዐጸድ፡ ወቆመ፡ ዲበ፡ ምድር። |
|---|
| 89:5 | ወኵሎሙ፡ አልሕምት፡ እለ፡ ውስተ፡ ውእቱ፡ ዐጸድ፡ ተጋብኡ፡ እስከነ፡ ርኢክዎሙ፡ ይሰጠሙ፡ ወይትወኀጡ፡ ወይትሀጐሉ፡ በውእቱ፡ ማይ። | ወኵሎሙ፡ አልሕምት፡ እለ፡ ውስተ፡ ውእቱ፡ ዐጸድ፡ ተጋብኡ፡ እስከነ፡ ርኢክዎሙ፡ ይሰጠሙ፡ ወይትወኀጡ፡ ወይትሀጐሉ፡ በውእቱ፡ ማይ። |
|---|
| 89:6 | ወውእቱ፡ መስቀር፡ ይደቢ፡ ዲበ፡ ማይ፡ ወኵሎሙ፡ አልሕምት፡ ወነጌያት፡ ወአግማል፡ ወአእዱግ፡ ተሰጥሙ፡ ውስተ፡ ምድር፡ ወኵሉ፡ እንስሳ፡ ወኢክህልኩ፡ ርእዮቶሙ፡ ወእሙንቱሂ፡ ስእኑ፡ ወፂአ፡ ወተሀጕሉ፡ ወተሰጥሙ፡ ውስተ፡ ቀላይ። | ወውእቱ፡ መስቀር፡ ይደቢ፡ ዲበ፡ ማይ፡ ወኵሎሙ፡ አልሕምት፡ ወነጌያት፡ ወአግማል፡ ወአእዱግ፡ ተሰጥሙ፡ ውስተ፡ ምድር፡ ወኵሉ፡ እንስሳ፡ ወኢክህልኩ፡ ርእዮቶሙ፡ ወእሙንቱሂ፡ ስእኑ፡ ወፂአ፡ ወተሀጕሉ፡ ወተሰጥሙ፡ ውስተ፡ ቀላይ። |
|---|
| 89:7 | ወካዕበ፡ ርኢኩ፡ በራእይ፡ እስከ፡ ሰሰሉ፡ እልኩ፡ አስራብ፡ እምዝኩ፡ ናሕስ፡ ልዑል፡ ወንቅዓተ፡ ምድር፡ ዐረየ፡ ወማዕምቃት፡ ካልኣን፡ ተፈትሑ። | ወካዕበ፡ ርኢኩ፡ በራእይ፡ እስከ፡ ሰሰሉ፡ እልኩ፡ አስራብ፡ እምዝኩ፡ ናሕስ፡ ልዑል፡ ወንቅዓተ፡ ምድር፡ ዐረየ፡ ወማዕምቃት፡ ካልኣን፡ ተፈትሑ። |
|---|
| 89:8 | ወአኀዘ፡ ማይ፡ ይረድ፡ ውስቴቶሙ፡ እስከነ፡ ተከሥተ፡ ምድር፡ ወውእቱ፡ መስቀር፡ ነበረ፡ ውስተ፡ ምድር፡ ወተግሕሠት፡ ጽልመት፡ ወኮነ፡ ብርሃን። | ወአኀዘ፡ ማይ፡ ይረድ፡ ውስቴቶሙ፡ እስከነ፡ ተከሥተ፡ ምድር፡ ወውእቱ፡ መስቀር፡ ነበረ፡ ውስተ፡ ምድር፡ ወተግሕሠት፡ ጽልመት፡ ወኮነ፡ ብርሃን። |
|---|
| 89:9 | ወውእቱ፡ ላሕም፡ ጸዐዳ፡ ዘኮነ፡ ብእሴ፡ ወፅአ፡ እምዝኩ፡ መስቀር፡ ወሠለስቱ፡ አልሕምት፡ ምስሌሁ፡ ወኮነ፡ አሐዱ፡ ዝኩ፡ እምሠለስቱ፡ አልሕምት፡ ጸዐዳ፡ ይመስሎ፡ ለዝኩ፡ ላሕም፡ ወአሐዱ፡ እምኔሆሙ፡ ቀይሕ፡ ከመ፡ ደም፡ ወአሐዱ፡ ጸሊም፡ ወውእቱ፡ ዝኩ፡ ላሕም፡ ጸዐዳ፡ ኀለፈ፡ እምኔሆሙ። | ወውእቱ፡ ላሕም፡ ጸዐዳ፡ ዘኮነ፡ ብእሴ፡ ወፅአ፡ እምዝኩ፡ መስቀር፡ ወሠለስቱ፡ አልሕምት፡ ምስሌሁ፡ ወኮነ፡ አሐዱ፡ ዝኩ፡ እምሠለስቱ፡ አልሕምት፡ ጸዐዳ፡ ይመስሎ፡ ለዝኩ፡ ላሕም፡ ወአሐዱ፡ እምኔሆሙ፡ ቀይሕ፡ ከመ፡ ደም፡ ወአሐዱ፡ ጸሊም፡ ወውእቱ፡ ዝኩ፡ ላሕም፡ ጸዐዳ፡ ኀለፈ፡ እምኔሆሙ። |
|---|
| 89:10 | ወአኀዙ፡ ይለዱ፡ አራዊተ፡ ገዳም፡ ወአዕዋፈ፡ ወኮነ፡ እምኔሆሙ፡ ዘእምኵሎሙ፡ ኅብረ፡ አሕዛብ፡ አናብስተ፡ ወአናምርተ፡ አዝእብተ፡ ወአክልብተ፡ አጽዕብተ፡ ወሐራውያ፡ ገዳም፡ ቈናጽለ፡ ወግሔያተ፡ ሐንዘረ፡ ወሲሲተ፡ አንስርተ፡ ወአውስተ፡ ሆባየ፡ ወፎቃንሰ፡ ወቋዓተ፡ ወተወልደ፡ ማእከሎሙ፡ ላሕም፡ ጸዐዳ። | ወአኀዙ፡ ይለዱ፡ አራዊተ፡ ገዳም፡ ወአዕዋፈ፡ ወኮነ፡ እምኔሆሙ፡ ዘእምኵሎሙ፡ ኅብረ፡ አሕዛብ፡ አናብስተ፡ ወአናምርተ፡ አዝእብተ፡ ወአክልብተ፡ አጽዕብተ፡ ወሐራውያ፡ ገዳም፡ ቈናጽለ፡ ወግሔያተ፡ ሐንዘረ፡ ወሲሲተ፡ አንስርተ፡ ወአውስተ፡ ሆባየ፡ ወፎቃንሰ፡ ወቋዓተ፡ ወተወልደ፡ ማእከሎሙ፡ ላሕም፡ ጸዐዳ። |
|---|
| 89:11 | ወአኀዙ፡ ይትናሰኩ፡ በበይናቲሆሙ፡ አሐዱ፡ ምስለ፡ ካልኡ፡ ወዝኩ፡ ላሕም፡ ጸዐዳ፡ ዘተወልደ፡ ማእከሎሙ፡ ወለደ፡ አድገ፡ ገዳም፡ ወላሕመ፡ ጸዐዳ፡ ምስሌሁ፡ ወበዝኁ፡ አእዱገ፡ ገዳም። | ወአኀዙ፡ ይትናሰኩ፡ በበይናቲሆሙ፡ አሐዱ፡ ምስለ፡ ካልኡ፡ ወዝኩ፡ ላሕም፡ ጸዐዳ፡ ዘተወልደ፡ ማእከሎሙ፡ ወለደ፡ አድገ፡ ገዳም፡ ወላሕመ፡ ጸዐዳ፡ ምስሌሁ፡ ወበዝኁ፡ አእዱገ፡ ገዳም። |
|---|
| 89:12 | ወውእቱ፡ ላሕም፡ ዘተወልደ፡ እምኔሁ፡ ወለደ፡ ሐራውያ፡ ገዳም፡ ጸሊመ፡ ወበግዐ፡ ጸዐዳ፡ ወውእቱ፡ ሐራውያ፡ ገዳም፡ ወለደ፡ አሕርወ፡ ብዙኃነ፡ ወውእቱ፡ በግዕ፡ ወለደ፡ ዐሠርተ፡ ወክልኤተ፡ አባግዐ። | ወውእቱ፡ ላሕም፡ ዘተወልደ፡ እምኔሁ፡ ወለደ፡ ሐራውያ፡ ገዳም፡ ጸሊመ፡ ወበግዐ፡ ጸዐዳ፡ ወውእቱ፡ ሐራውያ፡ ገዳም፡ ወለደ፡ አሕርወ፡ ብዙኃነ፡ ወውእቱ፡ በግዕ፡ ወለደ፡ ዐሠርተ፡ ወክልኤተ፡ አባግዐ። |
|---|
| 89:13 | ወሶበ፡ ልህቁ፡ እልክቱ፡ እሙንቱ፡ ዐሠርቱ፡ ወክልኤቱ፡ አባግዕ፡ ለአሐዱ፡ እምኔሆሙ፡ መጠውዎ፡ ለአእዱገ፡ ገዳም፡ ወእልክቱ፡ አእዱገ፡ ገዳም፡ ካዕበ፡ መጠውዎ፡ ለዝኩ፡ በግዕ፡ ለአዝእብት፡ ወልህቀ፡ ዝኩ፡ በግዕ፡ ማእከለ፡ አዝእብት። | ወሶበ፡ ልህቁ፡ እልክቱ፡ እሙንቱ፡ ዐሠርቱ፡ ወክልኤቱ፡ አባግዕ፡ ለአሐዱ፡ እምኔሆሙ፡ መጠውዎ፡ ለአእዱገ፡ ገዳም፡ ወእልክቱ፡ አእዱገ፡ ገዳም፡ ካዕበ፡ መጠውዎ፡ ለዝኩ፡ በግዕ፡ ለአዝእብት፡ ወልህቀ፡ ዝኩ፡ በግዕ፡ ማእከለ፡ አዝእብት። |
|---|
| 89:14 | ወእግዚእ፡ አምጽኦሙ፡ ለዐሠርቱ፡ ወአሐዱ፡ አባግዕ፡ ከመ፡ ይኅድሩ፡ ምስሌሁ፡ ወይትረዐዩ፡ ምስሌሁ፡ ማእከለ፡ አዝእብት፡ ወበዝኁ፡ ወኮኑ፡ መራዕየ፡ ብዙኃነ፡ ዘአባግዕ። | ወእግዚእ፡ አምጽኦሙ፡ ለዐሠርቱ፡ ወአሐዱ፡ አባግዕ፡ ከመ፡ ይኅድሩ፡ ምስሌሁ፡ ወይትረዐዩ፡ ምስሌሁ፡ ማእከለ፡ አዝእብት፡ ወበዝኁ፡ ወኮኑ፡ መራዕየ፡ ብዙኃነ፡ ዘአባግዕ። |
|---|
| 89:15 | ወወጠኑ፡ አዝእብት፡ እንዘ፡ ይፈርህዎሙ፡ ወአጠቅዎሙ፡ እስከ፡ የኀልቁ፡ ደቂቆሙ፡ ወገደፉ፡ ደቂቆሙ፡ በውሒዘ፡ ማይ፡ ብዙኅ፡ ወእልኩ፡ አባግዕ፡ ወጠኑ፡ ይጽርሑ፡ በእንተ፡ ደቂቆሙ፡ ወይስክዩ፡ ኀበ፡ እግዚኦሙ። | ወወጠኑ፡ አዝእብት፡ እንዘ፡ ይፈርህዎሙ፡ ወአጠቅዎሙ፡ እስከ፡ የኀልቁ፡ ደቂቆሙ፡ ወገደፉ፡ ደቂቆሙ፡ በውሒዘ፡ ማይ፡ ብዙኅ፡ ወእልኩ፡ አባግዕ፡ ወጠኑ፡ ይጽርሑ፡ በእንተ፡ ደቂቆሙ፡ ወይስክዩ፡ ኀበ፡ እግዚኦሙ። |
|---|
| 89:16 | ወበግዕ፡ ዘድኅነ፡ እምነ፡ አዝእብት፡ ነፍጸ፡ ወኀለፈ፡ ውስተ፡ አእዱገ፡ ገዳም፡ ወርኢክዎሙ፡ ለአባግዕ፡ እንዘ፡ የዐወይዉ፡ ወይጸርሑ፡ ወይስእልዎ፡ ለእግዚኦሙ፡ በኵሉ፡ ኀይሎሙ፡ እስከ፡ ወረደ፡ ዝኩ፡ እግዚአ፡ አባግዕ፡ ኀበ፡ ቃሎሙ፡ ለአባግዕ፡ እምጽርሕ፡ ልዑል፡ ወበጽሐ፡ ኀቤሆሙ፡ ወርእዮሙ። | ወበግዕ፡ ዘድኅነ፡ እምነ፡ አዝእብት፡ ነፍጸ፡ ወኀለፈ፡ ውስተ፡ አእዱገ፡ ገዳም፡ ወርኢክዎሙ፡ ለአባግዕ፡ እንዘ፡ የዐወይዉ፡ ወይጸርሑ፡ ወይስእልዎ፡ ለእግዚኦሙ፡ በኵሉ፡ ኀይሎሙ፡ እስከ፡ ወረደ፡ ዝኩ፡ እግዚአ፡ አባግዕ፡ ኀበ፡ ቃሎሙ፡ ለአባግዕ፡ እምጽርሕ፡ ልዑል፡ ወበጽሐ፡ ኀቤሆሙ፡ ወርእዮሙ። |
|---|
| 89:17 | ወጸውዖ፡ ለዝኩ፡ በግዕ፡ ዘተኀጥአ፡ እምአዝእብት፡ ወተናግሮ፡ በእንተ፡ አዝእብት፡ ከመ፡ ያስምዕ፡ ዲቤሆሙ፡ ከመ፡ ኢይግስስዎሙ፡ ለአባግዕ። | ወጸውዖ፡ ለዝኩ፡ በግዕ፡ ዘተኀጥአ፡ እምአዝእብት፡ ወተናግሮ፡ በእንተ፡ አዝእብት፡ ከመ፡ ያስምዕ፡ ዲቤሆሙ፡ ከመ፡ ኢይግስስዎሙ፡ ለአባግዕ። |
|---|
| 89:18 | ወሖረ፡ ዝኩ፡ በግዕ፡ ኀበ፡ አዝእብት፡ በቃለ፡ እግዚእ፡ ወካልእ፡ በግዕ፡ ተራከቦ፡ ለውእቱ፡ በግዕ፡ ወሖረ፡ ምስሌሁ፡ ወቦኡ፡ ክልኤሆሙ፡ ኅቡረ፡ ውስተ፡ ማኅበሮሙ፡ ለእልኩ፡ አዝእብት፡ ወተናገርዎሙ፡ ወአስምዑ፡ ዲቤሆሙ፡ ከመ፡ እምይእዜ፡ ኢይግስስዎሙ፡ ለአባግዕ። | ወሖረ፡ ዝኩ፡ በግዕ፡ ኀበ፡ አዝእብት፡ በቃለ፡ እግዚእ፡ ወካልእ፡ በግዕ፡ ተራከቦ፡ ለውእቱ፡ በግዕ፡ ወሖረ፡ ምስሌሁ፡ ወቦኡ፡ ክልኤሆሙ፡ ኅቡረ፡ ውስተ፡ ማኅበሮሙ፡ ለእልኩ፡ አዝእብት፡ ወተናገርዎሙ፡ ወአስምዑ፡ ዲቤሆሙ፡ ከመ፡ እምይእዜ፡ ኢይግስስዎሙ፡ ለአባግዕ። |
|---|
| 89:19 | ወእምኔሁ፡ ርኢክዎሙ፡ ለአዝእብት፡ ወእፎ፡ ጸንዑ፡ ፈድፋደ፡ ዲበ፡ አባግዕ፡ በኵሉ፡ ኀይሎሙ፡ ወጸርሑ፡ አባግዕ። | ወእምኔሁ፡ ርኢክዎሙ፡ ለአዝእብት፡ ወእፎ፡ ጸንዑ፡ ፈድፋደ፡ ዲበ፡ አባግዕ፡ በኵሉ፡ ኀይሎሙ፡ ወጸርሑ፡ አባግዕ። |
|---|
| 89:20 | ወእግዚኦሙ፡ መጽአ፡ ኀቤሆሙ፡ ለአባግዕ፡ ወአኀዘ፡ ይዝብጦሙ፡ ለእልኩ፡ አዝእብት፡ ወአዝእብት፡ አኀዙ፡ የዐውይዉ፡ ወአባግዕ፡ አርመሙ፡ ወእምሶቤሃ፡ ኢጸርሑ። | ወእግዚኦሙ፡ መጽአ፡ ኀቤሆሙ፡ ለአባግዕ፡ ወአኀዘ፡ ይዝብጦሙ፡ ለእልኩ፡ አዝእብት፡ ወአዝእብት፡ አኀዙ፡ የዐውይዉ፡ ወአባግዕ፡ አርመሙ፡ ወእምሶቤሃ፡ ኢጸርሑ። |
|---|
| 89:21 | ወርኢክዎሙ፡ ለአባግዕ፡ እስከ፡ ወፅኡ፡ እምአዝእብት፡ ወአዝእብት፡ ተጸለሉ፡ አዕይንቲሆሙ፡ ወወፅኡ፡ እንዘ፡ ይተልውዎሙ፡ ለአባግዕ፡ እልኩ፡ አዝእብት፡ በኵሉ፡ ኀይሎሙ። | ወርኢክዎሙ፡ ለአባግዕ፡ እስከ፡ ወፅኡ፡ እምአዝእብት፡ ወአዝእብት፡ ተጸለሉ፡ አዕይንቲሆሙ፡ ወወፅኡ፡ እንዘ፡ ይተልውዎሙ፡ ለአባግዕ፡ እልኩ፡ አዝእብት፡ በኵሉ፡ ኀይሎሙ። |
|---|
| 89:22 | ወእግዚኦሙ፡ ለአባግዕ፡ ሖረ፡ ምስሌሆሙ፡ እንዘ፡ ይመርሖሙ፡ ወኵሎሙ፡ አባግዒሁ፡ ተለውዎ፡ ወገጹ፡ ስቡሕ፡ ወክቡር፡ ወግሩም፡ ራእዩ፡ ወክቡር። | ወእግዚኦሙ፡ ለአባግዕ፡ ሖረ፡ ምስሌሆሙ፡ እንዘ፡ ይመርሖሙ፡ ወኵሎሙ፡ አባግዒሁ፡ ተለውዎ፡ ወገጹ፡ ስቡሕ፡ ወክቡር፡ ወግሩም፡ ራእዩ፡ ወክቡር። |
|---|
| 89:23 | ወአዝእብተሰ፡ አኀዙ፡ ይትልውዎሙ፡ ለእልኩ፡ አባግዕ፡ እስከ፡ ተራከብዎሙ፡ በአሐቲ፡ አይገ፡ ማይ። | ወአዝእብተሰ፡ አኀዙ፡ ይትልውዎሙ፡ ለእልኩ፡ አባግዕ፡ እስከ፡ ተራከብዎሙ፡ በአሐቲ፡ አይገ፡ ማይ። |
|---|
| 89:24 | ወውእቱ፡ አይገ፡ ማይ፡ ተሠጠ፡ ወቆመ፡ ማይ፡ እምዝየ፡ ወእምዝየ፡ በቅድመ፡ ገጾሙ፡ ወእግዚኦሙ፡ ለአባግዕ፡ ይመርሖሙ፡ ወቆመ፡ ማእከሎሙ፡ ወማእከለ፡ አዝእብት። | ወውእቱ፡ አይገ፡ ማይ፡ ተሠጠ፡ ወቆመ፡ ማይ፡ እምዝየ፡ ወእምዝየ፡ በቅድመ፡ ገጾሙ፡ ወእግዚኦሙ፡ ለአባግዕ፡ ይመርሖሙ፡ ወቆመ፡ ማእከሎሙ፡ ወማእከለ፡ አዝእብት። |
|---|
| 89:25 | ወዓዲሆሙ፡ እልክቱ፡ አዝእብት፡ ኢርእይዎሙ፡ ለአባግዕ፡ ወሖሩ፡ ማእከለ፡ ዝኩ፡ አይገ፡ ማይ፡ ወአዝእብት፡ ተለውዎሙ፡ ለአባግዕ፡ ወሮጹ፡ ድኅሬሆሙ፡ እልክቱ፡ አዝእብት፡ በዝኩ፡ አይገ፡ ማይ። | ወዓዲሆሙ፡ እልክቱ፡ አዝእብት፡ ኢርእይዎሙ፡ ለአባግዕ፡ ወሖሩ፡ ማእከለ፡ ዝኩ፡ አይገ፡ ማይ፡ ወአዝእብት፡ ተለውዎሙ፡ ለአባግዕ፡ ወሮጹ፡ ድኅሬሆሙ፡ እልክቱ፡ አዝእብት፡ በዝኩ፡ አይገ፡ ማይ። |
|---|
| 89:26 | ወሶበ፡ ርእይዎ፡ ለእግዚኦሙ፡ ለአባግዕ፡ ገብኡ፡ ከመ፡ ይጕየዩ፡ እምቅድመ፡ ገጹ፡ ወዝኩ፡ አይገ፡ ማይ፡ ተጋብአ፡ ወኮነ፡ ከመ፡ ፍጥረቱ፡ ፍጡነ፡ ወመልአ፡ ማይ፡ ወተለዐለ፡ እስከ፡ ከደኖሙ፡ ለእልክቱ፡ አዝእብት። | ወሶበ፡ ርእይዎ፡ ለእግዚኦሙ፡ ለአባግዕ፡ ገብኡ፡ ከመ፡ ይጕየዩ፡ እምቅድመ፡ ገጹ፡ ወዝኩ፡ አይገ፡ ማይ፡ ተጋብአ፡ ወኮነ፡ ከመ፡ ፍጥረቱ፡ ፍጡነ፡ ወመልአ፡ ማይ፡ ወተለዐለ፡ እስከ፡ ከደኖሙ፡ ለእልክቱ፡ አዝእብት። |
|---|
| 89:27 | ወርኢኩ፡ እስከ፡ ተሀጕሉ፡ ኵሎሙ፡ አዝእብት፡ እለ፡ ተለውዎሙ፡ ለእልክቱ፡ አባግዕ፡ ወተሰጥሙ። | ወርኢኩ፡ እስከ፡ ተሀጕሉ፡ ኵሎሙ፡ አዝእብት፡ እለ፡ ተለውዎሙ፡ ለእልክቱ፡ አባግዕ፡ ወተሰጥሙ። |
|---|
| 89:28 | ወአባግዕሰ፡ ኀለፉ፡ እምዝኩ፡ ማይ፡ ወወፅኡ፡ ውስተ፡ በድው፡ ኀበ፡ አልቦ፡ ማይ፡ ወሣዕር፡ ወአኀዙ፡ ይክሥቱ፡ አዕይንቲሆሙ፡ ወይርአዩ፡ ወርኢኩ፡ እግዚኦሙ፡ ለአባግዕ፡ ይርዕዮሙ፡ ወይሁቦሙ፡ ማየ፡ ወሣዕረ፡ ወዝኩ፡ በግዕ፡ እንዘ፡ የሐውር፡ ይመርሖሙ። | ወአባግዕሰ፡ ኀለፉ፡ እምዝኩ፡ ማይ፡ ወወፅኡ፡ ውስተ፡ በድው፡ ኀበ፡ አልቦ፡ ማይ፡ ወሣዕር፡ ወአኀዙ፡ ይክሥቱ፡ አዕይንቲሆሙ፡ ወይርአዩ፡ ወርኢኩ፡ እግዚኦሙ፡ ለአባግዕ፡ ይርዕዮሙ፡ ወይሁቦሙ፡ ማየ፡ ወሣዕረ፡ ወዝኩ፡ በግዕ፡ እንዘ፡ የሐውር፡ ይመርሖሙ። |
|---|
| 89:29 | ወዐርገ፡ ዲበ፡ ድማሑ፡ ለዝኩ፡ ኰኵሕ፡ ነዊኅ፡ ወእግዚኦሙ፡ ለአባግዕ፡ ፈነዎ፡ ኀቤሆሙ። | ወዐርገ፡ ዲበ፡ ድማሑ፡ ለዝኩ፡ ኰኵሕ፡ ነዊኅ፡ ወእግዚኦሙ፡ ለአባግዕ፡ ፈነዎ፡ ኀቤሆሙ። |
|---|
| 89:30 | ወእምኔሁ፡ ርኢክዎ፡ ለእግዚአ፡ አባግዕ፡ ዘቆመ፡ ቅድሜሆሙ፡ ወራእዩ፡ ዐቢይ፡ ወግሩም፡ ወኀያል፡ ወኵሎሙ፡ እልክቱ፡ አባግዕ፡ ርእይዎ፡ ወፈርሁ፡ እምገጹ። | ወእምኔሁ፡ ርኢክዎ፡ ለእግዚአ፡ አባግዕ፡ ዘቆመ፡ ቅድሜሆሙ፡ ወራእዩ፡ ዐቢይ፡ ወግሩም፡ ወኀያል፡ ወኵሎሙ፡ እልክቱ፡ አባግዕ፡ ርእይዎ፡ ወፈርሁ፡ እምገጹ። |
|---|
| 89:31 | ወኵሎሙ፡ እልክቱ፡ ይፈርሁ፡ ወይርዕዱ፡ እምኔሁ፡ ወይጸርሑ፡ ድኅሬሁ፡ ለዝኩ፡ በግዕ፡ ምስሌሁ፡ ዘሀሎ፡ ለካልእ፡ በግዕ፡ ዘኮነ፡ ማእከሎሙ፡ እስመ፡ ኢንክል፡ ቀዊመ፡ ቅድመ፡ እግዚእነ፡ ወኢነጽሮቶ። | ወኵሎሙ፡ እልክቱ፡ ይፈርሁ፡ ወይርዕዱ፡ እምኔሁ፡ ወይጸርሑ፡ ድኅሬሁ፡ ለዝኩ፡ በግዕ፡ ምስሌሁ፡ ዘሀሎ፡ ለካልእ፡ በግዕ፡ ዘኮነ፡ ማእከሎሙ፡ እስመ፡ ኢንክል፡ ቀዊመ፡ ቅድመ፡ እግዚእነ፡ ወኢነጽሮቶ። |
|---|
| 89:32 | ወገብአ፡ ዝኩ፡ በግዕ፡ ዘይመርሖሙ፡ ወዐርገ፡ በድማኀ፡ ዝኩ፡ ኰኵሕ፡ ወአባግዕ፡ አኀዙ፡ ይጸለሉ፡ አዕይንቲሆሙ፡ ወይስሐቱ፡ እምፍኖት፡ እንተ፡ አርአዮሙ፡ ወዝኩ፡ በግዕ፡ ኢያእመረ። | ወገብአ፡ ዝኩ፡ በግዕ፡ ዘይመርሖሙ፡ ወዐርገ፡ በድማኀ፡ ዝኩ፡ ኰኵሕ፡ ወአባግዕ፡ አኀዙ፡ ይጸለሉ፡ አዕይንቲሆሙ፡ ወይስሐቱ፡ እምፍኖት፡ እንተ፡ አርአዮሙ፡ ወዝኩ፡ በግዕ፡ ኢያእመረ። |
|---|
| 89:33 | ወእግዚኦሙ፡ ለአባግዕ፡ ተምዕዐ፡ ዐቢየ፡ መዓተ፡ ዲቤሆሙ፡ ወአእመረ፡ ዝኩ፡ በግዕ፡ ወወረደ፡ እምነ፡ ድማኁ፡ ለኰኵሕ፡ ወመጽአ፡ ኀበ፡ አባግዕ፡ ወረከበ፡ መብዝኅቶሙ፡ ዘጽሉላን፡ አዕይንቲሆሙ፡ ወእለ፡ ስሕቱ፡ እምፍኖቱ። | ወእግዚኦሙ፡ ለአባግዕ፡ ተምዕዐ፡ ዐቢየ፡ መዓተ፡ ዲቤሆሙ፡ ወአእመረ፡ ዝኩ፡ በግዕ፡ ወወረደ፡ እምነ፡ ድማኁ፡ ለኰኵሕ፡ ወመጽአ፡ ኀበ፡ አባግዕ፡ ወረከበ፡ መብዝኅቶሙ፡ ዘጽሉላን፡ አዕይንቲሆሙ፡ ወእለ፡ ስሕቱ፡ እምፍኖቱ። |
|---|
| 89:34 | ወሶበ፡ ርእይዎ፡ ፈርሁ፡ ወርዕዱ፡ እምቅድመ፡ ገጹ፡ ወፈቀዱ፡ ከመ፡ ይግብኡ፡ ለዐጸደ፡ ዚኣሆሙ። | ወሶበ፡ ርእይዎ፡ ፈርሁ፡ ወርዕዱ፡ እምቅድመ፡ ገጹ፡ ወፈቀዱ፡ ከመ፡ ይግብኡ፡ ለዐጸደ፡ ዚኣሆሙ። |
|---|
| 89:35 | ወዝኩ፡ በግዕ፡ ነሥአ፡ ምስሌሁ፡ አባግዐ፡ ወቦኡ፡ ኀበ፡ እልክቱ፡ አባግዕ፡ እለ፡ ስሕቱ፡ ወእም፡ ዝ፡ እንዘ፡ ይቅትሎሙ፡ ወአባግዕ፡ ፈርሁ፡ እምገጹ፡ ወአግብኦሙ፡ ለእልኩ፡ አባግዕ፡ እለ፡ ስሕቱ፡ ውእቱ፡ በግዕ፡ ወገብኡ፡ ውስተ፡ አዕጻዲሆሙ። | ወዝኩ፡ በግዕ፡ ነሥአ፡ ምስሌሁ፡ አባግዐ፡ ወቦኡ፡ ኀበ፡ እልክቱ፡ አባግዕ፡ እለ፡ ስሕቱ፡ ወእም፡ ዝ፡ እንዘ፡ ይቅትሎሙ፡ ወአባግዕ፡ ፈርሁ፡ እምገጹ፡ ወአግብኦሙ፡ ለእልኩ፡ አባግዕ፡ እለ፡ ስሕቱ፡ ውእቱ፡ በግዕ፡ ወገብኡ፡ ውስተ፡ አዕጻዲሆሙ። |
|---|
| 89:36 | ወርኢኩ፡ በህየ፡ ራእይ፡ እስከ፡ ውእቱ፡ በግዕ፡ ኮነ፡ ብእሴ፡ ወሐነጸ፡ ቤተ፡ ለእግዚአ፡ አባግዕ፡ ወለኵሎሙ፡ አባግዕ፡ አቀሞሙ፡ በውእቱ፡ ቤት። | ወርኢኩ፡ በህየ፡ ራእይ፡ እስከ፡ ውእቱ፡ በግዕ፡ ኮነ፡ ብእሴ፡ ወሐነጸ፡ ቤተ፡ ለእግዚአ፡ አባግዕ፡ ወለኵሎሙ፡ አባግዕ፡ አቀሞሙ፡ በውእቱ፡ ቤት። |
|---|
| 89:37 | ወርኢኩ፡ እስከ፡ ሰከበ፡ ውእቱ፡ በግዕ፡ ዘተራከቦ፡ ለዝኩ፡ በግዕ፡ ዘመርሖሙ፡ ለአባግዕ፡ ወርኢኩ፡ እስከ፡ ተሀጕሉ፡ ኵሎሙ፡ አባግዕ፡ ዐቢያን፡ ወንኡሳን፡ ተንሥኡ፡ ህየንቴሆሙ፡ ወቦኡ፡ ውስተ፡ መርዔት፡ ወቀርቡ፡ ኀበ፡ ፈለገ፡ ማይ። | ወርኢኩ፡ እስከ፡ ሰከበ፡ ውእቱ፡ በግዕ፡ ዘተራከቦ፡ ለዝኩ፡ በግዕ፡ ዘመርሖሙ፡ ለአባግዕ፡ ወርኢኩ፡ እስከ፡ ተሀጕሉ፡ ኵሎሙ፡ አባግዕ፡ ዐቢያን፡ ወንኡሳን፡ ተንሥኡ፡ ህየንቴሆሙ፡ ወቦኡ፡ ውስተ፡ መርዔት፡ ወቀርቡ፡ ኀበ፡ ፈለገ፡ ማይ። |
|---|
| 89:38 | ወዝኩ፡ በግዕ፡ ዘይመርሖሙ፡ ወዘኮነ፡ ብእሴ፡ ተሌለየ፡ እምኔሆሙ፡ ወሰከበ፡ ወኵሎሙ፡ አባግዕ፡ ኀሠሥዎ፡ ወጸርሑ፡ ዲቤሁ፡ ዐቢየ፡ ጽራሐ። | ወዝኩ፡ በግዕ፡ ዘይመርሖሙ፡ ወዘኮነ፡ ብእሴ፡ ተሌለየ፡ እምኔሆሙ፡ ወሰከበ፡ ወኵሎሙ፡ አባግዕ፡ ኀሠሥዎ፡ ወጸርሑ፡ ዲቤሁ፡ ዐቢየ፡ ጽራሐ። |
|---|
| 89:39 | ወርኢኩ፡ እስከ፡ አርመሙ፡ እምጽራሑ፡ ለዝኩ፡ በግዕ፡ ወኀለፍዎ፡ ለዝኩ፡ ውሒዘ፡ ማይ፡ ወቆሙ፡ አባግዕ፡ ኵሎሙ፡ እለ፡ ይመርሕዎሙ፡ ተክሎሙ፡ ለእለ፡ ሰከቡ፡ ወመርሕዎሙ። | ወርኢኩ፡ እስከ፡ አርመሙ፡ እምጽራሑ፡ ለዝኩ፡ በግዕ፡ ወኀለፍዎ፡ ለዝኩ፡ ውሒዘ፡ ማይ፡ ወቆሙ፡ አባግዕ፡ ኵሎሙ፡ እለ፡ ይመርሕዎሙ፡ ተክሎሙ፡ ለእለ፡ ሰከቡ፡ ወመርሕዎሙ። |
|---|
| 89:40 | ወርኢኩ፡ አባግዕ፡ እስከ፡ ይበውኡ፡ ውስተ፡ መካን፡ ሠናይ፡ ወምድር፡ ሐዋዝ፡ ወስብሕት፡ ወርኢኩ፡ እልኩ፡ አባግዕ፡ እስከ፡ ጸግቡ፡ ወውእቱ፡ ቤት፡ ማእከሎሙ፡ በምድር፡ ሐዋዝ። | ወርኢኩ፡ አባግዕ፡ እስከ፡ ይበውኡ፡ ውስተ፡ መካን፡ ሠናይ፡ ወምድር፡ ሐዋዝ፡ ወስብሕት፡ ወርኢኩ፡ እልኩ፡ አባግዕ፡ እስከ፡ ጸግቡ፡ ወውእቱ፡ ቤት፡ ማእከሎሙ፡ በምድር፡ ሐዋዝ። |
|---|
| 89:41 | ወቦ፡ ሶበ፡ ይትከሠታ፡ አዕይንቲሆሙ፡ ወቦ፡ ኀበ፡ ይጼለሉ፡ እስከ፡ ተንሥአ፡ ካልእ፡ በግዕ፡ ወመርሖሙ፡ ወአግብኦሙ፡ ለኵሎሙ፡ ወተከሥታ፡ አዕይንቲሆሙ። | ወቦ፡ ሶበ፡ ይትከሠታ፡ አዕይንቲሆሙ፡ ወቦ፡ ኀበ፡ ይጼለሉ፡ እስከ፡ ተንሥአ፡ ካልእ፡ በግዕ፡ ወመርሖሙ፡ ወአግብኦሙ፡ ለኵሎሙ፡ ወተከሥታ፡ አዕይንቲሆሙ። |
|---|
| 89:42 | ወአኀዙ፡ አክላብ፡ ወቈናጽል፡ ወሐራውያ፡ ሐቅል፡ ይብልዕዎሙ፡ ለእልኩ፡ አባግዕ፡ እስከ፡ ተንሥአ፡ ካልእ፡ በግዕ፡ አሐዱ፡ እምኔሆሙ፡ ሐርጌ፡ ዘይመርሖሙ። | ወአኀዙ፡ አክላብ፡ ወቈናጽል፡ ወሐራውያ፡ ሐቅል፡ ይብልዕዎሙ፡ ለእልኩ፡ አባግዕ፡ እስከ፡ ተንሥአ፡ ካልእ፡ በግዕ፡ አሐዱ፡ እምኔሆሙ፡ ሐርጌ፡ ዘይመርሖሙ። |
|---|
| 89:43 | ወዝኩ፡ ሐርጌ፡ አኀዘ፡ ይውጋእ፡ እም፡ ዝየ፡ ወእም፡ ዝየ፡ እልክተ፡ አክላበ፡ ወቈናጽለ፡ ወሐራውያ፡ ገዳም፡ እስከ፡ ለኵሎሙ፡ አህጐሎሙ። | ወዝኩ፡ ሐርጌ፡ አኀዘ፡ ይውጋእ፡ እም፡ ዝየ፡ ወእም፡ ዝየ፡ እልክተ፡ አክላበ፡ ወቈናጽለ፡ ወሐራውያ፡ ገዳም፡ እስከ፡ ለኵሎሙ፡ አህጐሎሙ። |
|---|
| 89:44 | ወውእቱ፡ በግዕ፡ ተፈትሐ፡ አዕይንቲሁ፡ ወርእየ፡ ዝኰ፡ ሐርጌ፡ ዘማእከለ፡ አባግዕ፡ ዘኀደገ፡ ስብሐቶ፡ ወአኀዘ፡ ይጕድኦሙ፡ ለእሙንቱ፡ አባግዕ፡ ወኬዶሙ፡ ወሖረ፡ ዘእንበለ፡ ተድላ። | ወውእቱ፡ በግዕ፡ ተፈትሐ፡ አዕይንቲሁ፡ ወርእየ፡ ዝኰ፡ ሐርጌ፡ ዘማእከለ፡ አባግዕ፡ ዘኀደገ፡ ስብሐቶ፡ ወአኀዘ፡ ይጕድኦሙ፡ ለእሙንቱ፡ አባግዕ፡ ወኬዶሙ፡ ወሖረ፡ ዘእንበለ፡ ተድላ። |
|---|
| 89:45 | ወእግዚኦሙ፡ ለአባግዕ፡ ፈነዎ፡ ለበግዕ፡ ኀበ፡ ካልእ፡ በግዕ፡ ወአንሥኦ፡ ከመ፡ ይኩን፡ ሐርጌ፡ ወይምርሖሙ፡ ለአባግዕ፡ ህየንተ፡ ዝኩ፡ በግዕ፡ ዘኀደገ፡ ስብሐቶ። | ወእግዚኦሙ፡ ለአባግዕ፡ ፈነዎ፡ ለበግዕ፡ ኀበ፡ ካልእ፡ በግዕ፡ ወአንሥኦ፡ ከመ፡ ይኩን፡ ሐርጌ፡ ወይምርሖሙ፡ ለአባግዕ፡ ህየንተ፡ ዝኩ፡ በግዕ፡ ዘኀደገ፡ ስብሐቶ። |
|---|
| 89:46 | ወሖረ፡ ኀቤሁ፡ ወተናገሮ፡ ለባሕቲቱ፡ ወአንሥኦ፡ ለውእቱ፡ ሐርጌ፡ ወገብሮ፡ መኰንነ፡ ወመራሔ፡ ለአባግዕ፡ ወበኵሉ፡ ዝ፡ እልክቱ፡ አክላብ፡ ያጽሕብዎሙ፡ ለአባግዕ። | ወሖረ፡ ኀቤሁ፡ ወተናገሮ፡ ለባሕቲቱ፡ ወአንሥኦ፡ ለውእቱ፡ ሐርጌ፡ ወገብሮ፡ መኰንነ፡ ወመራሔ፡ ለአባግዕ፡ ወበኵሉ፡ ዝ፡ እልክቱ፡ አክላብ፡ ያጽሕብዎሙ፡ ለአባግዕ። |
|---|
| 89:47 | ወሐርጌ፡ ቀዳማዊ፡ ሰደዶ፡ ለዝኩ፡ ሐርጌ፡ ደኃራዊ፡ ወተንሥአ፡ ዝኩ፡ ሐርጌ፡ ደኃራዊ፡ ወነፍጸ፡ እምቅድመ፡ ገጹ፡ ወርኢኩ፡ እስከ፡ አውደቅዎ፡ እልኩ፡ አክላብ፡ ለሐርጌ፡ ቀዳማዊ። | ወሐርጌ፡ ቀዳማዊ፡ ሰደዶ፡ ለዝኩ፡ ሐርጌ፡ ደኃራዊ፡ ወተንሥአ፡ ዝኩ፡ ሐርጌ፡ ደኃራዊ፡ ወነፍጸ፡ እምቅድመ፡ ገጹ፡ ወርኢኩ፡ እስከ፡ አውደቅዎ፡ እልኩ፡ አክላብ፡ ለሐርጌ፡ ቀዳማዊ። |
|---|
| 89:48 | ወተንሥአ፡ ዝኩ፡ ሐርጌ፡ ደኃራዊ፡ ወመርሖሙ፡ ለአባግዕ፡ ንኡሳን፡ ወዝ፡ ሐርጌ፡ ደኃራዊ፡ ወለደ፡ አባግዐ፡ ብዙኃነ፡ ወሰከበ፡ ወበግዕ፡ ንኡስ፡ ኮነ፡ ሐርጌ፡ ህየንቴሁ፡ ወኮነ፡ መኰንነ፡ ወመራሔ፡ ለእልክቱ፡ አባግዕ። | ወተንሥአ፡ ዝኩ፡ ሐርጌ፡ ደኃራዊ፡ ወመርሖሙ፡ ለአባግዕ፡ ንኡሳን፡ ወዝ፡ ሐርጌ፡ ደኃራዊ፡ ወለደ፡ አባግዐ፡ ብዙኃነ፡ ወሰከበ፡ ወበግዕ፡ ንኡስ፡ ኮነ፡ ሐርጌ፡ ህየንቴሁ፡ ወኮነ፡ መኰንነ፡ ወመራሔ፡ ለእልክቱ፡ አባግዕ። |
|---|
| 89:49 | ወልህቁ፡ ወበዝኁ፡ እልክቱ፡ አባግዕ፡ ወኵሎሙ፡ እልክቱ፡ አክላብ፡ ወቈናጽል፡ ወሐራውያ፡ ገዳም፡ ፈርሁ፡ ወነፍጹ፡ እምኔሁ፡ ወውእቱ፡ ሐርጌ፡ ጐድአ፡ ወቀተለ፡ ኵሎ፡ አራዊተ፡ ወኢክህሉ፡ ዳግመ፡ እልኩ፡ አራዊት፡ ማእከለ፡ አባግዕ፡ ወኢምንተኒ፡ ግሙራ፡ ኢመሠጡ፡ እምኔሆሙ። | ወልህቁ፡ ወበዝኁ፡ እልክቱ፡ አባግዕ፡ ወኵሎሙ፡ እልክቱ፡ አክላብ፡ ወቈናጽል፡ ወሐራውያ፡ ገዳም፡ ፈርሁ፡ ወነፍጹ፡ እምኔሁ፡ ወውእቱ፡ ሐርጌ፡ ጐድአ፡ ወቀተለ፡ ኵሎ፡ አራዊተ፡ ወኢክህሉ፡ ዳግመ፡ እልኩ፡ አራዊት፡ ማእከለ፡ አባግዕ፡ ወኢምንተኒ፡ ግሙራ፡ ኢመሠጡ፡ እምኔሆሙ። |
|---|
| 89:50 | ወዝኩ፡ ቤት፡ ኮነ፡ ዐቢየ፡ ወርኂበ፡ ወተሐንጸ፡ ለእልኩ፡ አባግዕ፡ ማኅፈድ፡ ነዊኅ፡ ዲበ፡ ዝኩ፡ ቤት፡ ለእግዚአ፡ አባግዕ፡ ወተትሕተ፡ ዝኩ፡ ቤት፡ ወማኅፈድሰ፡ ተለዐለ፡ ወኮነ፡ ነዊኀ፡ ወእግዚአ፡ አባግዕ፡ ቆመ፡ ዲበ፡ ውእቱ፡ ማኅፈድ፡ ወማእደ፡ ምልእተ፡ አቅረቡ፡ በቅድሜሁ። | ወዝኩ፡ ቤት፡ ኮነ፡ ዐቢየ፡ ወርኂበ፡ ወተሐንጸ፡ ለእልኩ፡ አባግዕ፡ ማኅፈድ፡ ነዊኅ፡ ዲበ፡ ዝኩ፡ ቤት፡ ለእግዚአ፡ አባግዕ፡ ወተትሕተ፡ ዝኩ፡ ቤት፡ ወማኅፈድሰ፡ ተለዐለ፡ ወኮነ፡ ነዊኀ፡ ወእግዚአ፡ አባግዕ፡ ቆመ፡ ዲበ፡ ውእቱ፡ ማኅፈድ፡ ወማእደ፡ ምልእተ፡ አቅረቡ፡ በቅድሜሁ። |
|---|
| 89:51 | ወርኢክዎሙ፡ ካዕበ፡ ለእልክቱ፡ አባግዕ፡ ካዕበ፡ ከመ፡ ስሕቱ፡ ወሖሩ፡ በብዙኅ፡ ፍናዋት፡ ወኀደጉ፡ ዝኰ፡ ቤተ፡ ዚኣሆሙ፡ ወእግዚኦሙ፡ ለአባግዕ፡ ጸውዐ፡ እምውስቴቶሙ፡ ለአባግዕ፡ ወለአኮሙ፡ ኀበ፡ አባግዕ፡ ወአባግዕ፡ አኀዙ፡ ይቅትልዎሙ። | ወርኢክዎሙ፡ ካዕበ፡ ለእልክቱ፡ አባግዕ፡ ካዕበ፡ ከመ፡ ስሕቱ፡ ወሖሩ፡ በብዙኅ፡ ፍናዋት፡ ወኀደጉ፡ ዝኰ፡ ቤተ፡ ዚኣሆሙ፡ ወእግዚኦሙ፡ ለአባግዕ፡ ጸውዐ፡ እምውስቴቶሙ፡ ለአባግዕ፡ ወለአኮሙ፡ ኀበ፡ አባግዕ፡ ወአባግዕ፡ አኀዙ፡ ይቅትልዎሙ። |
|---|
| 89:52 | ወአሐዱ፡ እምኔሆሙ፡ ድኅነ፡ ወኢተቀትለ፡ ወቀነጸ፡ ወጸርሐ፡ ዲበ፡ አባግዕ፡ ወፈቀዱ፡ ይቅትልዎ፡ ወእግዚኦሙ፡ ለአባግዕ፡ አድኀኖ፡ እምእዴሆሙ፡ ለአባግዕ፡ ወአዕረጎ፡ ኀቤየ፡ ወአንበሮ። | ወአሐዱ፡ እምኔሆሙ፡ ድኅነ፡ ወኢተቀትለ፡ ወቀነጸ፡ ወጸርሐ፡ ዲበ፡ አባግዕ፡ ወፈቀዱ፡ ይቅትልዎ፡ ወእግዚኦሙ፡ ለአባግዕ፡ አድኀኖ፡ እምእዴሆሙ፡ ለአባግዕ፡ ወአዕረጎ፡ ኀቤየ፡ ወአንበሮ። |
|---|
| 89:53 | ወካልኣነ፡ አባግዐ፡ ብዙኃነ፡ ፈነወ፡ ኀቤሆሙ፡ ለእልኩ፡ አባግዕ፡ ያስምዑ፡ ወየዐውይዉ፡ ዲቤሆሙ። | ወካልኣነ፡ አባግዐ፡ ብዙኃነ፡ ፈነወ፡ ኀቤሆሙ፡ ለእልኩ፡ አባግዕ፡ ያስምዑ፡ ወየዐውይዉ፡ ዲቤሆሙ። |
|---|
| 89:54 | ወእምኔሁ፡ ርኢኩ፡ ሶበ፡ ኀደጉ፡ ቤቶ፡ ለእግዚአ፡ አባግዕ፡ ወማኅፈደ፡ ወእምኵሉ፡ ስሕቱ፡ ወተጸለለ፡ አዕይንቲሆሙ፡ ወርኢኩ፡ እግዚአ፡ አባግዕ፡ ከመ፡ ገብረ፡ ቀትለ፡ ብዙኀ፡ ዲቤሆሙ፡ በበ፡ መራዕይሆሙ፡ እስከ፡ ይጼውዕዎ፡ እልኩ፡ አባግዕ፡ ለዝኩ፡ ቀትል፡ ወአግብኡ፡ መካኖ። | ወእምኔሁ፡ ርኢኩ፡ ሶበ፡ ኀደጉ፡ ቤቶ፡ ለእግዚአ፡ አባግዕ፡ ወማኅፈደ፡ ወእምኵሉ፡ ስሕቱ፡ ወተጸለለ፡ አዕይንቲሆሙ፡ ወርኢኩ፡ እግዚአ፡ አባግዕ፡ ከመ፡ ገብረ፡ ቀትለ፡ ብዙኀ፡ ዲቤሆሙ፡ በበ፡ መራዕይሆሙ፡ እስከ፡ ይጼውዕዎ፡ እልኩ፡ አባግዕ፡ ለዝኩ፡ ቀትል፡ ወአግብኡ፡ መካኖ። |
|---|
| 89:55 | ወኀደጎሙ፡ ውስተ፡ እደ፡ አናብስት፡ ወአናምርት፡ ወአዝእብት፡ ወአጽእብት፡ ወውስተ፡ እደ፡ ቈናጽል፡ ወዲበ፡ ኵሉ፡ አራዊት፡ ወአኀዙ፡ እልክቱ፡ አራዊተ፡ ገዳም፡ ይምሥጥዎሙ፡ ለእልኩ፡ አባግዕ። | ወኀደጎሙ፡ ውስተ፡ እደ፡ አናብስት፡ ወአናምርት፡ ወአዝእብት፡ ወአጽእብት፡ ወውስተ፡ እደ፡ ቈናጽል፡ ወዲበ፡ ኵሉ፡ አራዊት፡ ወአኀዙ፡ እልክቱ፡ አራዊተ፡ ገዳም፡ ይምሥጥዎሙ፡ ለእልኩ፡ አባግዕ። |
|---|
| 89:56 | ወርኢኩ፡ ከመ፡ ኀደጉ፡ ዝኰ፡ ቤተ፡ ዚኣሆሙ፡ ወማኅፈዶሙ፡ ወወደዮሙ፡ ለኵሎሙ፡ ውስተ፡ እደ፡ አናብስት፡ ከመ፡ ይምሥጥዎሙ፡ ወከመ፡ ይብልዕዎሙ፡ ውስተ፡ እደዊሆሙ፡ ለኵሎሙ፡ አራዊት። | ወርኢኩ፡ ከመ፡ ኀደጉ፡ ዝኰ፡ ቤተ፡ ዚኣሆሙ፡ ወማኅፈዶሙ፡ ወወደዮሙ፡ ለኵሎሙ፡ ውስተ፡ እደ፡ አናብስት፡ ከመ፡ ይምሥጥዎሙ፡ ወከመ፡ ይብልዕዎሙ፡ ውስተ፡ እደዊሆሙ፡ ለኵሎሙ፡ አራዊት። |
|---|
| 89:57 | ወአነ፡ አኀዝኩ፡ እጽራሕ፡ በኵሉ፡ ኀይልየ፡ ወእጸውዖ፡ ለእግዚአ፡ አባግዕ፡ ወኣርእዮ፡ በእንተ፡ አባግዕ፡ እስመ፡ ተበልዑ፡ ወተውኅጡ፡ እምኵሎሙ፡ አራዊተ፡ ገዳም። | ወአነ፡ አኀዝኩ፡ እጽራሕ፡ በኵሉ፡ ኀይልየ፡ ወእጸውዖ፡ ለእግዚአ፡ አባግዕ፡ ወኣርእዮ፡ በእንተ፡ አባግዕ፡ እስመ፡ ተበልዑ፡ ወተውኅጡ፡ እምኵሎሙ፡ አራዊተ፡ ገዳም። |
|---|
| 89:58 | ወውእቱ፡ አርመመ፡ እንዘ፡ ይሬኢ፡ ወተፈሥሐ፡ እስመ፡ ተበልዑ፡ ወተውኅጡ፡ ወተሀይዱ፡ ወኀደጎሙ፡ ውስተ፡ እደ፡ ኵሎሙ፡ አራዊት፡ ለመብልዕ። | ወውእቱ፡ አርመመ፡ እንዘ፡ ይሬኢ፡ ወተፈሥሐ፡ እስመ፡ ተበልዑ፡ ወተውኅጡ፡ ወተሀይዱ፡ ወኀደጎሙ፡ ውስተ፡ እደ፡ ኵሎሙ፡ አራዊት፡ ለመብልዕ። |
|---|
| 89:59 | ወጸውዐ፡ ሰብዐ፡ ኖላውያነ፡ ወገደፎሙ፡ ለእልኩ፡ አባግዕ፡ ከመ፡ ይርዐይዎሙ፡ ወይቤሎሙ፡ ለኖላውያን፡ ወለፀማዶሙ፡ ኵሉ፡ አሐዱ፡ አሐዱ፡ እምኔክሙ፡ እምይእዜ፡ ይርዐይዎሙ፡ ለአባግዕ፡ ወኵሎ፡ ዘእኤዝዘክሙ፡ አነ፡ ግበሩ። | ወጸውዐ፡ ሰብዐ፡ ኖላውያነ፡ ወገደፎሙ፡ ለእልኩ፡ አባግዕ፡ ከመ፡ ይርዐይዎሙ፡ ወይቤሎሙ፡ ለኖላውያን፡ ወለፀማዶሙ፡ ኵሉ፡ አሐዱ፡ አሐዱ፡ እምኔክሙ፡ እምይእዜ፡ ይርዐይዎሙ፡ ለአባግዕ፡ ወኵሎ፡ ዘእኤዝዘክሙ፡ አነ፡ ግበሩ። |
|---|
| 89:60 | ወእሜጥወክሙ፡ አነ፡ በኍልቍ፡ ወእነግረክሙ፡ ዘይትሀጐል፡ እምኔሆሙ፡ ወኪያሆሙ፡ አህጕሉ፡ ወመጠወ፡ ሎሙ፡ እልክተ፡ አባግዐ። | ወእሜጥወክሙ፡ አነ፡ በኍልቍ፡ ወእነግረክሙ፡ ዘይትሀጐል፡ እምኔሆሙ፡ ወኪያሆሙ፡ አህጕሉ፡ ወመጠወ፡ ሎሙ፡ እልክተ፡ አባግዐ። |
|---|
| 89:61 | ወለካልእ፡ ጸውዖ፡ ወይቤሎ፡ ለቡ፡ ወርኢ፡ ኵሎ፡ ዘይገብሩ፡ ኖሎት፡ ዲበ፡ እሉ፡ አባግዕ፡ እስመ፡ ያሀጕሉ፡ እምውስቴቶሙ፡ ፈድፋደ፡ እምዘአዘዝክዎሙ። | ወለካልእ፡ ጸውዖ፡ ወይቤሎ፡ ለቡ፡ ወርኢ፡ ኵሎ፡ ዘይገብሩ፡ ኖሎት፡ ዲበ፡ እሉ፡ አባግዕ፡ እስመ፡ ያሀጕሉ፡ እምውስቴቶሙ፡ ፈድፋደ፡ እምዘአዘዝክዎሙ። |
|---|
| 89:62 | ወኵሎ፡ ጽጋበ፡ ወሀጕለ፡ ዘይትገበር፡ በኖሎት፡ ጸሐፍ፡ ሚ፡ መጠነ፡ ያሀጕልዎሙ፡ በትእዛዝየ፡ ወሚ፡ መጠነ፡ ያሀጕሉ፡ በርእሶሙ፡ ወኵሎሙ፡ ለለ፡ አሐዱ፡ አሐዱ፡ ኖላዊ፡ ጸሐፍ፡ ዲቤሆሙ። | ወኵሎ፡ ጽጋበ፡ ወሀጕለ፡ ዘይትገበር፡ በኖሎት፡ ጸሐፍ፡ ሚ፡ መጠነ፡ ያሀጕልዎሙ፡ በትእዛዝየ፡ ወሚ፡ መጠነ፡ ያሀጕሉ፡ በርእሶሙ፡ ወኵሎሙ፡ ለለ፡ አሐዱ፡ አሐዱ፡ ኖላዊ፡ ጸሐፍ፡ ዲቤሆሙ። |
|---|
| 89:63 | ወበኍልቍ፡ አንብብ፡ በቅድሜየ፡ ወሚ፡ መጠነ፡ ያሀጕሉ፡ ወሚ፡ መጠነ፡ ይሜጥውዎሙ፡ ለሀጕል፡ ከመ፡ ይኩን፡ ሊተ፡ ዝንቱ፡ ስምዐ፡ ዲቤሆሙ፡ ከመ፡ ኣእምር፡ ኵሎ፡ ግብሮሙ፡ ለኖላውያን፡ ወእመጥዎሙ፡ ወእርአይ፡ ዘይገብሩ፡ ለእመ፡ ይነብሩ፡ በትእዛዝየ፡ ዘአዘዝክዎሙ፡ ወእመ፡ አልቦ። | ወበኍልቍ፡ አንብብ፡ በቅድሜየ፡ ወሚ፡ መጠነ፡ ያሀጕሉ፡ ወሚ፡ መጠነ፡ ይሜጥውዎሙ፡ ለሀጕል፡ ከመ፡ ይኩን፡ ሊተ፡ ዝንቱ፡ ስምዐ፡ ዲቤሆሙ፡ ከመ፡ ኣእምር፡ ኵሎ፡ ግብሮሙ፡ ለኖላውያን፡ ወእመጥዎሙ፡ ወእርአይ፡ ዘይገብሩ፡ ለእመ፡ ይነብሩ፡ በትእዛዝየ፡ ዘአዘዝክዎሙ፡ ወእመ፡ አልቦ። |
|---|
| 89:64 | ወኢያእምሩ፡ ወኢታርእዮሙ፡ ወኢትዝልፎሙ፡ አላ፡ ጸሐፍ፡ ኵሎ፡ ሀጕሎሙ፡ ለኖላውያን፡ ለለ፡ አሐዱ፡ አሐዱ፡ ወአዕርግ፡ ኀቤየ፡ ኵሎ። | ወኢያእምሩ፡ ወኢታርእዮሙ፡ ወኢትዝልፎሙ፡ አላ፡ ጸሐፍ፡ ኵሎ፡ ሀጕሎሙ፡ ለኖላውያን፡ ለለ፡ አሐዱ፡ አሐዱ፡ ወአዕርግ፡ ኀቤየ፡ ኵሎ። |
|---|
| 89:65 | ወርኢኩ፡ እስከ፡ እልኩ፡ ኖላውያን፡ ይርዕዩ፡ በበ፡ ጊዜሁ፡ ወአኀዙ፡ ይቅትሉ፡ ወያህጕሉ፡ ብዙኃነ፡ እምትእዛዞሙ፡ ወኀደጉ፡ እልክተ፡ አባግዐ፡ ውስተ፡ እደ፡ አናብስት። | ወርኢኩ፡ እስከ፡ እልኩ፡ ኖላውያን፡ ይርዕዩ፡ በበ፡ ጊዜሁ፡ ወአኀዙ፡ ይቅትሉ፡ ወያህጕሉ፡ ብዙኃነ፡ እምትእዛዞሙ፡ ወኀደጉ፡ እልክተ፡ አባግዐ፡ ውስተ፡ እደ፡ አናብስት። |
|---|
| 89:66 | ወበልዑ፡ ወውኅጡ፡ መብዝኅቶሙ፡ ለእልኩ፡ አባግዕ፡ አናብስት፡ ወአናምርት፡ ወሐራውያ፡ ገዳም፡ በልዑ፡ ምስሌሆሙ፡ ወአውዐይዎ፡ ለዝኩ፡ ማኅፈድ፡ ወከረይዎ፡ ለዝኩ፡ ቤት፡ ዘአባግዕ። | ወበልዑ፡ ወውኅጡ፡ መብዝኅቶሙ፡ ለእልኩ፡ አባግዕ፡ አናብስት፡ ወአናምርት፡ ወሐራውያ፡ ገዳም፡ በልዑ፡ ምስሌሆሙ፡ ወአውዐይዎ፡ ለዝኩ፡ ማኅፈድ፡ ወከረይዎ፡ ለዝኩ፡ ቤት፡ ዘአባግዕ። |
|---|
| 89:67 | ወሐዘንኩ፡ ብዙኀ፡ ጥቀ፡ በእንተ፡ ማኅፈድ፡ እስመ፡ ተከርየ፡ ውእቱ፡ ቤት፡ ዘአባግዕ፡ ወእምኔሁ፡ ኢክህልኩ፡ ርእዮቶሙ፡ ለእልኩ፡ አባግዕ፡ ለእመ፡ ይበውኡ፡ ኀበ፡ ዝኩ፡ ቤት፡ ወለእመ፡ ኢይበውኡ። | ወሐዘንኩ፡ ብዙኀ፡ ጥቀ፡ በእንተ፡ ማኅፈድ፡ እስመ፡ ተከርየ፡ ውእቱ፡ ቤት፡ ዘአባግዕ፡ ወእምኔሁ፡ ኢክህልኩ፡ ርእዮቶሙ፡ ለእልኩ፡ አባግዕ፡ ለእመ፡ ይበውኡ፡ ኀበ፡ ዝኩ፡ ቤት፡ ወለእመ፡ ኢይበውኡ። |
|---|
| 89:68 | ወኖላውያን፡ ወፀማዶሙ፡ መጠውዎሙ፡ ለእልኩ፡ አባግዕ፡ ለኵሎሙ፡ አራዊተ፡ ገዳም፡ ከመ፡ ይብልዕዎሙ፡ ወኵሉ፡ አሐዱ፡ አሐዱ፡ እምኔሆሙ፡ በበ፡ ጊዜሁ፡ በኍልቍ፡ ይትሜጠዉ፡ ወኵሉ፡ አሐዱ፡ አሐዱ፡ እምኔሆሙ፡ ለካልኡ፡ በመጽሐፍ፡ ይጽሕፍ፡ ሚ፡ መጠነ፡ ያሀጕል፡ እምኔሆሙ፡ ለካልኡ፡ በመጽሐፍ። | ወኖላውያን፡ ወፀማዶሙ፡ መጠውዎሙ፡ ለእልኩ፡ አባግዕ፡ ለኵሎሙ፡ አራዊተ፡ ገዳም፡ ከመ፡ ይብልዕዎሙ፡ ወኵሉ፡ አሐዱ፡ አሐዱ፡ እምኔሆሙ፡ በበ፡ ጊዜሁ፡ በኍልቍ፡ ይትሜጠዉ፡ ወኵሉ፡ አሐዱ፡ አሐዱ፡ እምኔሆሙ፡ ለካልኡ፡ በመጽሐፍ፡ ይጽሕፍ፡ ሚ፡ መጠነ፡ ያሀጕል፡ እምኔሆሙ፡ ለካልኡ፡ በመጽሐፍ። |
|---|
| 89:69 | ወፈድፋደ፡ እምሥርዐቶሙ፡ አሐደ፡ አሐደ፡ ይቀትል፡ ወያሀጕል፡ ወአነ፡ አኀዝኩ፡ እብኪ፡ ወአዕዊ፡ በብዙኀ፡ ጥቀ፡ በእንተ፡ እልኩ፡ አባግዕ። | ወፈድፋደ፡ እምሥርዐቶሙ፡ አሐደ፡ አሐደ፡ ይቀትል፡ ወያሀጕል፡ ወአነ፡ አኀዝኩ፡ እብኪ፡ ወአዕዊ፡ በብዙኀ፡ ጥቀ፡ በእንተ፡ እልኩ፡ አባግዕ። |
|---|
| 89:70 | ወከመ፡ ዝ፡ በራእይ፡ ርኢክዎ፡ ለዝኩ፡ ዘይጽሕፍ፡ እፎ፡ ይጽሕፍ፡ ለአሐዱ፡ ዘይትሀጐል፡ እምነ፡ እልኩ፡ ኖላውያን፡ በኵሉ፡ ዕለት፡ ወየዐርግ፡ ወየዐርፍ፡ ወያርኢ፡ ኵሎ፡ ኪያሁ፡ መጽሐፈ፡ ለእግዚአ፡ አባግዕ፡ ኵሎ፡ ዘገብሩ፡ ወኵሎ፡ ዘአእተቱ፡ አሐዱ፡ አሐዱ፡ እምኔሆሙ፡ ወኵሎ፡ ዘመጠዉ፡ ለሀጕል። | ወከመ፡ ዝ፡ በራእይ፡ ርኢክዎ፡ ለዝኩ፡ ዘይጽሕፍ፡ እፎ፡ ይጽሕፍ፡ ለአሐዱ፡ ዘይትሀጐል፡ እምነ፡ እልኩ፡ ኖላውያን፡ በኵሉ፡ ዕለት፡ ወየዐርግ፡ ወየዐርፍ፡ ወያርኢ፡ ኵሎ፡ ኪያሁ፡ መጽሐፈ፡ ለእግዚአ፡ አባግዕ፡ ኵሎ፡ ዘገብሩ፡ ወኵሎ፡ ዘአእተቱ፡ አሐዱ፡ አሐዱ፡ እምኔሆሙ፡ ወኵሎ፡ ዘመጠዉ፡ ለሀጕል። |
|---|
| 89:71 | ወመጽሐፍ፡ ተነበ፡ በቅድመ፡ እግዚአ፡ አባግዕ፡ ወነሥኣ፡ ለመጽሐፍ፡ በእዱ፡ ወአንበባ፡ ወኀተማ፡ ወአንበራ። | ወመጽሐፍ፡ ተነበ፡ በቅድመ፡ እግዚአ፡ አባግዕ፡ ወነሥኣ፡ ለመጽሐፍ፡ በእዱ፡ ወአንበባ፡ ወኀተማ፡ ወአንበራ። |
|---|
| 89:72 | ወእምኔሁ፡ ርኢኩ፡ እንዘ፡ ይርዕዩ፡ ኖሎት፡ ዐሠርተ፡ ወክልኤተ፡ ሰዓተ፡ ወናሁ፡ ሠለስቱ፡ እምእልኩ፡ አባግዕ፡ ገብኡ፡ ወመጽኡ፡ ወቦኡ፡ ወአኀዙ፡ እንዘ፡ የሐንጹ፡ ኵሎ፡ ዘወድቀ፡ እምውእቱ፡ ቤት፡ ወሐራውያ፡ ገዳም፡ ከልእዎሙ፡ ወኢክህሉ። | ወእምኔሁ፡ ርኢኩ፡ እንዘ፡ ይርዕዩ፡ ኖሎት፡ ዐሠርተ፡ ወክልኤተ፡ ሰዓተ፡ ወናሁ፡ ሠለስቱ፡ እምእልኩ፡ አባግዕ፡ ገብኡ፡ ወመጽኡ፡ ወቦኡ፡ ወአኀዙ፡ እንዘ፡ የሐንጹ፡ ኵሎ፡ ዘወድቀ፡ እምውእቱ፡ ቤት፡ ወሐራውያ፡ ገዳም፡ ከልእዎሙ፡ ወኢክህሉ። |
|---|
| 89:73 | ወአኀዙ፡ ካዕበ፡ ይሕንጹ፡ ከመ፡ ቀዳሚ፡ ወአንሥእዎ፡ ለውእቱ፡ ማኅፈድ፡ ወይሰመይ፡ ማኅፈደ፡ ነዊኀ፡ ወርኢኩ፡ ካዕበ፡ እንዘ፡ ያነብሩ፡ ቅድመ፡ ማኅፈድ፡ ማእደ፡ ወኵሎ፡ ኅብስት፡ ዘዲቤሁ፡ ርኩስ፡ ወኢኮነ፡ ንጹሐ። | ወአኀዙ፡ ካዕበ፡ ይሕንጹ፡ ከመ፡ ቀዳሚ፡ ወአንሥእዎ፡ ለውእቱ፡ ማኅፈድ፡ ወይሰመይ፡ ማኅፈደ፡ ነዊኀ፡ ወርኢኩ፡ ካዕበ፡ እንዘ፡ ያነብሩ፡ ቅድመ፡ ማኅፈድ፡ ማእደ፡ ወኵሎ፡ ኅብስት፡ ዘዲቤሁ፡ ርኩስ፡ ወኢኮነ፡ ንጹሐ። |
|---|
| 89:74 | ወዲበ፡ ኵሉ፡ እሉ፡ አባግዕ፡ ጽሉላን፡ አዕይንቲሆሙ፡ ወኢይሬእዩ፡ ወኖሎቶሙኒ፡ ከማሁ፡ ወይሜጥውዎሙ፡ ለኖሎቶሙሂ፡ ለሀጕል፡ ፈድፋደ፡ ወበእገሪሆሙ፡ ይከይድዎሙ፡ ለአባግዕ፡ ወይበልዕዎሙ። | ወዲበ፡ ኵሉ፡ እሉ፡ አባግዕ፡ ጽሉላን፡ አዕይንቲሆሙ፡ ወኢይሬእዩ፡ ወኖሎቶሙኒ፡ ከማሁ፡ ወይሜጥውዎሙ፡ ለኖሎቶሙሂ፡ ለሀጕል፡ ፈድፋደ፡ ወበእገሪሆሙ፡ ይከይድዎሙ፡ ለአባግዕ፡ ወይበልዕዎሙ። |
|---|
| 89:75 | ወእግዚአ፡ አባግዕ፡ አርመመ፡ እስከነ፡ ተዘርዘሩ፡ ኵሉ፡ አባግዕ፡ ገዳመ፡ ወተደመሩ፡ ምስሌሆሙ፡ ወኢያድኀንዎሙ፡ እምእደ፡ አራዊት። | ወእግዚአ፡ አባግዕ፡ አርመመ፡ እስከነ፡ ተዘርዘሩ፡ ኵሉ፡ አባግዕ፡ ገዳመ፡ ወተደመሩ፡ ምስሌሆሙ፡ ወኢያድኀንዎሙ፡ እምእደ፡ አራዊት። |
|---|
| 89:76 | ወዝኩ፡ ዘይጽሕፍ፡ መጽሐፈ፡ አዕረጎ፡ ወአርአዮ፡ ወአንበበ፡ ኀበ፡ አብያተ፡ እግዚአ፡ አባግዕ፡ ወያስተበቍዖ፡ በእንቲኣሆሙ፡ ወይስእሎ፡ እንዘ፡ ያርእዮ፡ ኵሎ፡ ግብረ፡ ኖሎቶሙ፡ ወያሰምዕ፡ በቅድሜሁ፡ ዲበ፡ ኵሉ፡ ኖላውያን። | ወዝኩ፡ ዘይጽሕፍ፡ መጽሐፈ፡ አዕረጎ፡ ወአርአዮ፡ ወአንበበ፡ ኀበ፡ አብያተ፡ እግዚአ፡ አባግዕ፡ ወያስተበቍዖ፡ በእንቲኣሆሙ፡ ወይስእሎ፡ እንዘ፡ ያርእዮ፡ ኵሎ፡ ግብረ፡ ኖሎቶሙ፡ ወያሰምዕ፡ በቅድሜሁ፡ ዲበ፡ ኵሉ፡ ኖላውያን። |
|---|
| 89:77 | ወነሢኦ፡ አንበረ፡ ኀቤሁ፡ ኪያሁ፡ መጽሐፈ፡ ወወፅአ። | ወነሢኦ፡ አንበረ፡ ኀቤሁ፡ ኪያሁ፡ መጽሐፈ፡ ወወፅአ። |
|---|