詩篇 第 64 章

ፍጻሜ ፡ መዝሙር ፡ ዘዳዊት ። ስምዐኒ ፡ እግዚኦ ፡ ጸሎትየ ፡ ዘሰአልኩ ፡ ኀቤከ ፤ እምትሕዝብተ ፡ ጽላኢ ፡ አድኅና ፡ ለነፍስይ ።

ወሰውረኒ ፡ እምዕሌቶሙ ፡ ለእኩያን ፤ ወእምብዝኆሙ ፡ ለገበርተ ፡ ዐመፃ ።

እለ ፡ አብልኁ ፡ ልሳኖሙ ፡ ከመ ፡ አርዌ ፡ ምድር ፤ ወወሰቁ ፡ ቀስቶሙ ፡ ለገቢረ ፡ መሪር ። ከመ ፡ ይቅትልዎ ፡ ለንጹሕ ፡ በጽሚት ፤

ግብተ ፡ ይነድፍዎሙ ፡ ወኢይፈርሁ ። ወአጽንዑ ፡ ሎሙ ፡ ነገረ ፡ እኩየ ፡

ወተማከሩ ፡ ይኅብኡ ፡ ሎሙ ፡ መሥገርተ ፤ ወይቤሉ ፡ አልቦ ፡ ዘይሬእየነ ።

ወኀሠሥዋ ፡ ለዐመፃ ፡ ወኀልቁ ፡ እዝነ ፡ ይፈትኑ ፡ ወይወጥኑ ፤

ወይበውእ ፡ ሰብእ ፡ በልብ ፡ ዕሙቅ ፤ ወይትሌዐል ፡ እግዚአብሔር ።

ከመ ፡ ሐጸ ፡ ደቂቅ ፡ ኮነ ፡ መቅሠፍቶሙ ። ወደክመ ፡ ለሳኖሙ ፡ በላዕሌሆሙ ፡

ወደንገፁ ፡ ኵሎሙ ፡ እለ ፡ ርእይዎሙ ። ወፈርሁ ፡ ኵሉ ፡ ሰብእ ፡

ወነገሩ ፡ ግብረ ፡ እግዚአብሔር ፤ ወአእመሩ ፡ ምግባሮ ።

ይትፌሣሕ ፡ ጻድቅ ፡ በእግዚአብሔር ፡ ወይትዌከል ፡ ቦቱ ፤ ወይከብሩ ፡ ኵሎሙ ፡ ርቱዓነ ፡ ልብ ።